యోధాను యోధులు

క్రికెట్ అభిమానులు ఎప్పుడెప్పుడా అని ఎదురుచూసిన వరల్డ్‌ కప్‌ టోర్నీ రానే వచ్చింది. ఈ టోర్నీలో 14 దేశాలు తమ అదృష్టాన్ని పరీక్షించుకోనున్నారు. ఇప్పటివరకు నాలుగు సార్లు వరల్డ్‌ కప్‌ ట్రోఫీని కైవసం చేసుకొని చరిత్ర సృష్టించిన ఆస్ట్రేలియా జట్టు డిఫెండింగ్‌ ఛాంపియన్‌గా ఈ టోర్నీలో పాల్గొనబోతోంది. దాదాపు అన్ని జట్లకు కూడా ప్రతిష్ఠాత్మకంగా మారిన ఈ టోర్నీలో ఆటగాళ్ల ఎంపికలో ఆయా దేశాలు అనేక జాగ్రత్తలు తీసుకున్నారుు. అంతకుముందు జరిగిన వరల్డ్‌కప్‌ టోర్నీల్లో ఆడిన ఆటగాళ్లను ఎంపికచేయడానిేక ఆయా జట్లు ఎక్కువ ప్రాధాన్యతను ఇచ్చారు. ఈ ఆటగాళ్లలో చాలా మంది గత వరల్డ్‌ కప్‌ టోర్నీల్లో (2003, 2007) ఉత్తమ బ్యాట్స్‌మెన్లు, బౌలర్లు, ఫీల్డర్లు, ఆల్‌రౌండర్లుగా రికార్డులు సాధించారు. అంతటితో ఆగకుండా త్వరలో జరగనున్న వరల్డ్‌ కప్‌లో కూడా తమ సత్తా చాటాలని ఉవ్విళ్లూరుతున్నారు. ఈ ఆటగాళ్లెవరెవరో నేటి ప్రత్యేక సంచికలో తెలుసుకుందాం.

సచిన్‌ టెండుల్కర్‌ (బారత్‌)
వరల్డ్‌ కప్‌లో పాల్గొంటున్న వెటరన్‌ ఆటగాళ్ల జాబితాలో భారత మాస్టర్‌ బ్లాస్టర్‌ ముందు వరుసలో ఉంటాడు. ఇప్పటివరకు వరుసగా ఐదు ప్రపంచ కప్‌ ((1992-2007) టోర్నీల్లో అతను పాల్గొన్నాడు. ఈసారి జరగనున్న టోర్నీ సచిన్‌కు ఆరవది. ఈ వరల్డ్‌ కప్‌ టోర్నీలో పాల్గొనడం ద్వారా పాక్‌ ఆటగాడు జావేద్‌ మియాందాద్‌ నెలకొల్పిన ఆరు వరల్డ్‌ కప్‌ టోర్నీల్లో పాల్గొన్న రికార్డును అతను సమం చేయనున్నాడు. సుధీర్ఘమైన రెండు దశాబ్దాలకు పైగా గల తన క్రికెట్‌ కెరీర్లో సచిన్‌ ఆడే చివరి వరల్డ్‌ కప్‌ ఇదేనని అందరు భావిస్తున్నారు. ఈ వరల్డ్‌ కప్‌ను గెలిచి సచిన్‌కు కానుకగా ఇవ్వాలనే కృత నిశ్చయంతో మహేంద్ర సింగ్‌ ధోని నేతృత్వంలోని టీం ఇండియా ఉంది. బ్యాటింగ్‌ విభాగంలోని దాదాపు అన్ని రికార్డులను తన పేరిట లిఖించుకున్న ఈ భారత మాస్టర్‌ బ్లాస్టర్‌ వరల్డ్‌ కప్‌ టోర్నీల్లో అత్యధిక పరుగులు చేసిన బ్యాట్స్‌మెన్ల జాబితాలో అగ్రస్థానంలో కొనసాగుతున్నాడు. 2003లో జరిగిన వరల్డ్‌ కప్‌ టోర్నీలో అత్యధిక పరుగులు చేసిన బ్యాట్స్‌మెన్ల జాబితాలో అగ్ర స్థానంలో సచిన్‌ నిలిచాడు.

ఆ టోర్నీలో మొత్తం 11 మ్యాచులు ఆడి 673 పరుగులను మాస్టర్‌ చేశాడు. ఇందులో 1 శతకంతో పాటు 6 అర్ధ శతకాలు ఉన్నాయి. సచిన్‌ ఉన్న ఈ జట్టు ఎలాగైన వరల్డ్‌ కప్‌ను గెలవాలని భారత క్రికెట్‌ అభిమానులు అందరూ ఆశిస్తున్నారు.

సెహ్వాగ్‌ భారత్‌
టీం ఇండియా డాషింగ్‌ ఓపెనర్‌గా తాను బ్యాట్‌తోనే కాదు ఫీల్డింగ్‌లో కూడా రాణించగలనని నిరూపించాడు. జట్టులో కీలకమైన బ్యాటింగ్‌ బాధ్యతలు మోస్తున్న సెహ్వాగ్‌ 2003లో జరిగిన వరల్డ్‌ కప్‌ టోర్నీలో తన ఫీల్డింగ్‌ సత్తాను ప్రపంచానికి చూపెట్టాడు. మొత్తం 11 మ్యాచుల్లో పాల్గొని ఏకంగా ఎనిమిది క్యాచులను పట్టాడు.


రికీ పాంటింగ్‌ ఆస్ట్రేలియా
కప్‌ను గెలిచి హ్యాట్రిక్‌ను సాధించాలనే ఆశతో ఈసారి జరగనున్న టోర్నీలో పాంటింగ్‌ కెప్టెన్సీ బాధ్యతలను నిర్వర్తించనున్నాడు. క్రీజులోకి రావడంతోటే దూకుడుగా ఆడడం పాంటింగ్‌ నైజం. 2003లో జరిగిన వరల్డ్‌ కప్‌లో మూడవ అత్యుత్తమ బ్యాట్స్‌మన్‌గా అతను అవతరించాడు. ఆడిన 11 మ్యాచుల్లో మొత్తం 415 పరుగులను సాధించి తన సత్తాను చాటాడు. ఇందులో ఒక సెంచరీ ఆరు హాఫ్‌ సెంచరీలు ఉన్నాయి. ఇంతటితో ఆగకుండా ఫీల్డింగ్‌ విభాగంలో కూడా అతను రాణించి అత్యధిక క్యాచులు పట్టిన ఫీల్డర్‌ మరో రికార్డును కూడా పాంటింగ్‌ నెలకొల్పాడు. ఇక 2007లో జరిగిన వరల్డ్‌ కప్‌లో కూడా పాంటింగ్‌ బ్యాటింగ్‌ విభాగంలో చెలరేగాడు. మొత్తం 11 మ్యాచులు ఆడిన 535 పరుగులను అతను సాధించాడు. ఇందులో ఒక శతకంతో పాటు నాలుగు అర్ధ శతకాలు ఉన్నాయి. అయితే ప్రతిష్ఠాత్మక యాషెస్‌ సిరీస్‌లో జట్టు ఘోరపరాజయం పాలు కావడం, భారత్‌లో జరిగిన టెస్టు సిరీస్‌లో ధోని సేన చేతిలో ఎదురైన సిరీస్‌ క్లీన్‌స్వీప్‌ నుంచి అతను బయటపడలేకపోయాడు.

ఉపఖండంలో జరగబోతోన్న ఈ వరల్డ్‌కప్‌ టోర్నీని గెలిచి కెప్టెన్‌గా సరిక్రొత్త రికార్డును సృష్టించాలనే ఆశ 36 ఏళ్ల పాంటింగ్‌లో కనబడుతోంది. ఇటీవలికాలంలో జట్టుకు వరుస పరాజయాలు ఎదురౌతున్న నేపథ్యంలో తన ఈ ప్రయత్నంలో పాంటింగ్‌ ఏ మేరకు విజయం సాధిస్తాడో వరల్డ్‌ ప్‌ పోరు వరకు వేచి చూడాల్సిందే.

మురళీధరన్‌ శ్రీలంక
మురళీధరన్‌కిది నాలుగవ వరల్డ్‌కప్‌..
1996లో జరిగిన వరల్డ్‌కప్‌లో శ్రీలంకను విశ్వవిజేతగా చేయడంలో అతను కీలకపాత్ర పోషించాడు. ఈసారి జరగనున్న వరల్డ్‌కప్‌లో కూడా ఈ 36 సంవత్సరాల స్పిన్‌ దిగ్గజం కీలకపాత్ర పోషించనున్నాడు. ఇప్పటికే టెస్టుల నుంచి రిటైరైన అతను వరల్డ్‌కప్‌లో పాల్గొనేందుకోసం ఎంతో ఆతృతగా ఎదురుచూస్తున్నాడు. ఉపఖండంపై జరుగుతున్న ఈ టోర్నీలో మురళీ బౌలింగ్‌ ప్రభావం ప్రత్యర్థులపై ఖచ్చితంగా ఉంటుందని చెప్పడంలో ఎలాంటి సందేహం లేదు. 2003లో జరిగిన వరల్డ్‌ కప్‌లో మురళీధరన్‌ 17 వికెట్లను కూల్చి ఆరవ స్థానంలో నిలవగా.. 2007 వరల్డ్‌ కప్‌ టోర్నీలో ఏకంగా 23 వికెట్లను కైవసం చేసుకొని అత్యధిక వికెట్లు తీసిన రెండవ బౌలర్‌ అయ్యాడు.

బ్రెట్‌లీ ఆస్టేలియా
ఈ ఆసీస్‌ ఫాస్ట్‌ బౌలర్‌ వరల్డ్‌ కప్‌ టోర్నీల్లో తన సత్తాను చాటాడు. గంటకు దాదాపు వంద మైళ్ల పరుగును అందుకునే సామర్ధ్యం ఉన్న బౌలర్‌గా గుర్తింపు పొందిన బ్రెట్‌ లీ 2003లో జరిగిన వరల్డ్‌ కప్‌ టోర్నీలో 22 వికెట్లను కూల్చి అత్యధిక వికెట్లు తీసిన బౌలర్ల జాబితాలో రెండవ స్థానంలో నిలిచాడు. ఈ టోర్నీలోని ఒక మ్యాచులో అతను 42 పరుగులిచ్చి 5 వికెట్లను తీశాడు. ఈసారి జరగునున్న వరల్డ్‌కప్‌లో కూడా బ్రెట్‌ లీ కీలక భూమికను పోషించే అవకాశాలు స్పష్టంగా కనబడుతున్నాయి.


జహీర్‌ ఖాన్‌ భారత్‌
ఈ భారత స్పీడ్‌స్టర్‌ కొత్త బంతిని స్వింగ్‌ చేయడంలో నేర్పరి. అంతే గాకుండా పాతబడ్డ బంతితో రివర్స్‌ స్వింగ్‌ను కూడా వేయగలడు. 2003లో జరిగిన వరల్డ్‌ కప్‌లో 18 వికెట్లను కూల్చి అత్యధిక వికెట్లను కూల్చిన బౌలర్ల జాబితాలో నాలుగవ స్థానాన్ని జహీర్‌ కైవసం చేసుకున్నాడు. ఈ వరల్డ్‌ కప్‌లో కూడా టీం ఇండియాలో జహీర్‌ కీలక భూమికను పోషించనున్నాడు.

కుమార సంగక్కర శ్రీలంక
ఈ వరల్డ్‌ కప్‌లో శ్రీలంక జట్టుకు సంగక్కర నేతృత్వం వహిస్తున్నాడు. వికెట్‌ కీపర్‌గా అనేక రికార్డులను అతను సొంతం చేసుకున్నాడు. గత రెండు వరల్డ్‌ కప్‌ టోర్నీల్లో కూడా అద్బుతంగా రాణించి సంగక్కర అందరి దృష్టిని ఆకర్షించాడు. 2003లో జరిగిన వరల్డ్‌ కప్‌టోర్నీలో 10 మ్యాచుల్లో పాల్గొన్న అతను 17 ఆటగాళ్లను ఔట్‌ చేసి బెస్ట్‌ వికెట్‌ కీపర్ల జాబితాలో రెండవ స్థానాన్ని సాధించాడు. ఇందులో 15 క్యాచులు రెండు స్టంప్‌ ఔట్‌లు ఉన్నాయి. అదే విధంగా 2007లో జరిగిన వరల్డ్‌కప్‌లో కూడా సంగక్కర రెండవ స్థానాన్ని కైవసం చేసుకున్నాడు. మొత్తం 11 మ్యాచ్‌లు ఆడి 15 మందిని ఔట్‌ చేశాడు. వీటిలో 11 క్యాచౌట్లు, 4 స్టంప్‌ ఔట్‌లు ఉన్నాయి.

బ్రెండన్‌ మెకల్లమ్‌ న్యూజిలాండ్‌
దూకుడు బ్యాటింగ్‌కు పెట్టింది పేరైన ఈ న్యూజిలాండర్‌ గత రెండు వరల్డ్‌ కప్‌ టోర్నీల్లో కూడా వికెట్‌ కీపర్‌గా బాగా రాణించాడు. 2003లో జరిగిన వరల్డ్‌ కప్‌ టోర్నీలో ఏడు మ్యాచుల్లో పాల్గొన్న మెకల్లమ్‌ తొమ్మిది మందిని పవేలియన్‌ దారి పట్టించాడు. అదే విధంగా 2007లో జరిగిన వరల్డ్‌ కప్‌లో 10 మ్యాచుల్లో పాల్గొన్న అతను 14 మంది బ్యాట్స్‌మెన్లను ఔట్‌ చేశాడు. వీటిలో 13 క్యాచులు, ఒక స్టంప్‌ఔట్‌ ఉన్నాయి. ఇక బ్యాటింగ్‌ విషయానికి వస్తే.. ఆకాశమే హద్దుగా రెచ్చిపోయే తత్వం మెకల్లమ్‌ది. ఒంటి చేత్తో మ్యాచును గెలిపించే సత్తా అతని సొంతం. బీసీసీఐ నిర్వహించే అత్యంత ప్రజాదరణ పొందిన ఐపీఎల్‌ టోర్నీ తొలి ఎడిషన్లో ఏకంగా సెంచరీ సాధించి అందరిని ఆశ్చర్య చకితుల్ని చేశాడు.

జాక్వెస్‌ కలిస్‌ సౌతాఫ్రికా


ఇప్పటివరకు ఒక్క వరల్డ్‌ కప్‌ టోర్నీని గెలవలేకపోయిన సౌతాఫ్రికా జట్టు ఈ టోర్నీలో ఫేవరేట్‌ జట్టుగా బరిలోకి దిగుతోంది. ఆల్‌రౌండర్‌ జాక్వెస్‌ కలిస్‌ పైనే జట్టును ముందుకు నడిపించాల్సి న బాధ్యత పడనుంది.

స్కాట్‌ స్ట్రైరిస్‌ న్యూజిలాండ్‌
35 ఏళ్ల ఈ కివీస్‌ ఆటగాడికి ఇది వరుసగా మూడో ప్రపంచకప్‌ టోర్నమెంట్‌. ఇప్పటివరకు జరిగిన ప్రపంచకప్‌ టోర్నీల్లో బాగా రాణించినా... వరల్డ్‌ కప్‌ ట్రోఫీ మాత్రం న్యూజిలాండ్‌ జట్టుకు ఇప్పటికీ అందని ద్రాక్షగానే మిగిలింది. ఈసారైన తమ తీరని కలను నెరవేర్చుకోవాలనే ఉద్దేశ్యంతో ఆ జట్టు ఉంది. ఆల్‌రౌండర్‌గా పేరుబడ్డ స్టైరిస్‌ గనుక రాణిస్తే.. జట్టుకు లాభిస్తుంది.

స్టీన్‌ టికోలో - కెన్యా
39 ఏళ్ల ఈ కెన్యా ఆటగాడు నాలుగవ సారి వరల్డ్‌కప్‌లో పాల్గొననున్నాడు. ఈ వరల్డ్‌ ప్‌ టోర్నీలో పాల్గొంటున్న ఆటగాళ్లలో అందరికంటే పెద్దవాడు అతడే కావడం విశేషం. కెన్యా జట్టు 1996లో జరిగిన ప్రపంచకప్‌ టోర్నీలో ఆరంగేట్రం చేసినప్పటినుంచి అతను జట్టులో కొనసాగుతున్నాడు. 2003 ప్రపంచకప్‌లో కెన్యా జట్టు సెమీస్‌కు చేరడంలో టికోలో కీలకపాత్ర పోషించాడు. ఈసారి కూడా జట్టును ముందుకు నడిపించే బాధ్యత అతనిపై పడనుంది.

కాలింగ్‌వుడ్‌ ఇంగ్లండ్‌
కాలింగ్‌వుడ్‌ వరుసగా మూడవ ప్రపంచకప్‌లో పాల్గొననున్నాడు. వికెట్ల మధ్య వేగంగా పరుగులు తీయడంలోను బౌండరీలు, సిక్సర్లను బాదడంలోను 34 సంవత్సరాల ఈ బ్యాట్స్‌మన్‌కు మంచి పట్టుంది. క్రికెట్‌కు జన్మస్థానమైన ఇంగ్లండ్‌ దేశం ఈసారి వరల్డ్‌కప్‌లో రాణించాలంటే కాలింగ్‌వుడ్‌ కీలకపాత్ర పోషించాల్సి ఉంటుంది.

చందర్‌పాల్‌ వెస్టిండీస్‌
కాలం పాటు జట్టుకు దూరమైన 36 చంద్రపౌల్‌ తిరిగి వరల్డ్‌కప్‌ జట్టులోకి వచ్చాడు. అతనికిది నాలుగో వరల్డ్‌ కప్‌. ఏ పరిస్థితుల్లోనైనా రాణించడం, భాగస్వామ్యాలు నిర్మించడం చందర్‌పౌల్‌ ప్రత్యేకత.